1000 dutke båhti Bådåddjuj/Buvvdaj

– Dát sjaddá niddo stuorra dutkamkonferánssa, ja dát sjaddá viek hávsske juohkkahattjaj gudi sáme- ja iemeálmmugij dutkamis berusti væráldav miehtáj.

Dav javllá Nuortta universitiehta Tove Mentsen Ness. Sån la Sáme ja iemeálmmugij dutkama guovdátja oajvve, ja sij guossodi NAISA-konferánsav dán jage.

NAISA, jali Native American and Indigenous Studies Association, la stuorámus rijkajgasskasasj akademalasj organisasjåvnnå iemeálmmukdutkama hárráj. Juohkka jage ásadi konferánsav masi båhtali akademihkkára, studenta, bieledis dutke ja bájkálasj åhpadusaktera ma iemeálmmuktiemáj birra berusti. Sij li ålles væráldis ja moattet fáhkasuorges. Dán jage li vargga tuvsán oassálasste.

Nuortta universitiehta nasjåvnålasj åvdåsvásstádus

– Nuortta universitiehtan la nasjåvnålasj åvdåsvásstádus julev- ja oarjjelsáme giela ja kultuvra dutkama ja oahpoj åvdås. NAISA l viek ájnas ariená váj galggap buktet iehtjama åvdåsvásstádusáv tjoavddet sebrudagá åvdås. Dánna oahppásijt oadtjop, værmádagájt ja alliánsajt tsieggip ietjá iemeálmmukjuohkusijda, massta vas ådå dutkam ihtá, javllá Mentsen Ness.

– Álmmuk åbbålattjat ájn diehtá ilá binnáv iemeálmmugij ja sámij birra. Munji l vájmo ássje galggap bágojs dagojda mannat, ja dájs tiemájs berustit galggá sjaddat luondulasj juohkka biejve jagev birra. Mij sihtap nannit iehtjama sáme- ja iemeálmmukperspektijvav divna dutkamin ja åhpadusán, ja NAISA l lávkke dan guovlluj váj nahkap jur dav, javllá Mentsen Ness.

Sáme márnán, vuosádusá ja konserta

NAISA 2024 rahpá almulattjat biehtsemáno 6. biejve Stormen kultuvrravieson, dåhku båhtali duola dagu NAISA presidænnta Vicente Diaz, Sámeráde presidænnta Áslat Holmberg, sámedikkeráde Mikkel Eskil Mikkelsen ja Bådådjo suohkanoajvve Odd Emil Ingebrigtsen.

Dan maŋŋela tjuovvu gålmmå biejve moadda dutkamsesjåvnåv avta buohta hotellajn Radisson Blu ja Quality Ramsalt Bådådjon. Konferánssa låhpaduvvá stuorra konsertajn Stormen kultuvrravieson lávvodagá biehtsemáno 8. biejve, Transjoikajn ja ietjá iemeálmmukartistaj.

Bådådjo viesáda ietján aj bessi NAISA-dáhpádusáv niektit. Stádan sjaddi vuosádusá, sáme márnán, pubinára ja konserta.