Søkjarar frå fire land vil bli dekan ved FLU

Stillinga som dekan på Fakultet for lærerutdanning og kunst- og kulturfag (FLU) ved Nord universitet har vekt internasjonal interesse. Det viser den offentlege søkjarlista som no er klar.

Fungerande rektor Levi Gårseth-Nesbakk er leiar for innstillingsutvalet. Han er nøgd med søkjarlista.

– Det er gledeleg å sjå at så mange ønskjar å bidra til å utvikle Fakultet for lærerutdanning og kunst- og kulturfag ved Nord universitet, seier han.

Fleire av søkjarane er for tida tilsette i heil og- eller deltidsstillinger ved Nord universitet. Men det har og kome søkjarar frå andre delar av Noreg, Finland, Sverige – og Sør-Afrika.

Dekanen for FLU er øvste leiar for fakultetet. Personen som blir tilsett, skal ikkje berre vere fakultetets faglege og administrative leiar for fakultetet internt og eksternt - nasjonalt og internasjonalt, men skal og spele ei sentral rolle i den faglege utviklinga av fakultetet.

Det gjeld særlig innan forsking, undervisning, formidling, innovasjon og kvalitetssikring av verksemnda ved fakultetet. Vedkomande vil og ha ansvar for doktorgradsprogrammet i profesjonsvitskap.

Søknadsfristen var 20. august og saka om tilsetjing skal handsamast av styret ved Nord universitet 22. oktober 2026.

Innstillingsutvalet består av:

• Levi Gårseth-Nesbakk, leiar
• Gøril Ursin, arbeidsgjevarrepresentant
• Kristoffer Hestvik Nerdal, studentrepresentant
• Renate Karin Nordnes, tillitsvald