Mojhtesebaakoe Levi Gårseth-Nesbakkeste, Noerhte universiteeten annjebodts rektovre, Gånka Haralden sealadimmien sjïekenisnie mïetsken 28.b. 2026:
Daan biejjien sïjhtebe gijhtelesvoetem buektedh Gånka Haralden jieledeguhkies dïenesjen åvteste Nöörjese jïh mijjese mah daesnie årroeh. 35 jaepieh Gånka Harald ektie symbovline orreme mijjen laantese. Baahkine, vijsiesvoetine, lustesvoetine jïh almetjevoetine dïhte almetjh gaajhkine tsiehkine jieliedisnie dïervesjamme. Staareste voenese, åerjielistie noerhtese dïhte tjïelke ïedtjem vuesiehtamme almetjidie, voenges seabradahkide jïh aarvojde mah mijjem iktedibie.
Gånka Harald lea monarke mij heartoeh jïh boerehkevoetem vuesiehtamme. Dïhte aavoeh jïh sårkoeh juakeme, jïh abpe nöörjen åålmegem vijsies baakoejgujmie jïh håalomigujmie baahkedamme. Dïhte teemah åvtese lutnjeme goh ålkoelisnie tjåadtjodh, jeatjahlaakan årrodh, joekehts såarhts gieriesvoeth jïh psykiske healsoe. Dïhte stïeresne orreme gosse ellen daerpiesommes orreme.
Mijjese Nordlaantesne jïh Trööndelagesne iktesth joekoen vyörtegs orreme Gånka Haralden lïhkesvoetem laantebealan dååjredh. Dïhte seahkarimmiem vuesiehtamme almetjidie, eatnamasse, kultuvrese jïh daajrose noerhtedajvine. Dïhte garmeresvoetem jïh ektiedimmiem sjugniedamme.
Sov gelliej fealadimmiej jïh gaavnedimmiej tjïrrh almetjigujmie, dïhte vuesiehtamme fïereguhte lea vihkele. Gånkapaarre lea Bådåddjosne orreme gellien aejkien, goh heevehtimmiefeelemisnie 2016 jïh mïerhkesjimmesne kultuvreåejviestaarejaepeste 2024. Ruffien lij stïeresne mïerhkesjimmine Saltstraumen lïhke. Gånka Harald njealjede nöörjen monarke mij sov monogrammem gånkagierkesne åadtjoeji.
Gånka Harald lea Trööndelagen vihkeles sijjiem nöörjen histovrijisnie åvtese lutnjeme gellien aejkien. Dïhte stieresne orreme mïerhkesjimmine Stiklestadesne jïh tåvsenejaepienheevehtimmesne Levangkesne 2011.
Gånka Harald boerehkevoetem vuesiehti jïh tïjjem guarkaji man sisnie jielieji. Stujmies baelien gosse leajhtadimmie vihkielåbpoe goh gåessie gih, gånka buektiehti åålmegem tjöönghkedh. Dïhte sov aarvoeh utniehti. Dïhte lij mavvas jïh væjsehke. Dïhte lij gånka mij åålmegen lïhke tjåadtjoeji.
Gæjhtoe gaajhken åvteste.
Mijjieh raeffiem Gånka Haralden mojhtesen bijjelen tjoevkebe.
