Foto: Lise Åserud / NTB
Levi Gårseth-Nesbakk, Nuortta universitiehta doajmme rievtora bágo, Gånågis Haralda jábmema aktijvuodan bårggemáno 28. biejve 2026:
Uddni sihtap Gånågis Haraldav gijttet suv viessomájge dievnastusá diehti Vuonarijka ja gájkaj åvdås gudi dáppe årrop. 35 jage l Gånågis Harald læhkám mijá rijka symbåvllån mij tjoahkkij. Liekkosvuodajn, vijssudagájn, suohttasij ja væhttsásvuodajn la sån æjvvalam ulmutjij divna iellema dilijn. Stádas smávva bájkijda, oarjját nuortas, la sån duodaj berustam ulmutjijs, bájkálasj sebrudagájs ja dajs árvojs ma mijáv aktij tjadni.
Gånågis Harald la monárkka guhti lij jállo ja rabásmielak. Sån la juogadam ávov ja surgov, ja lieggim ålles Vuona álmmuga vájmujt jærmálasj bágoj ja hålaj. Sån la låpptim dakkár tiemájt dagu gå ulmutja aktu báhtsi, gå li ietjálágátja, iesjguhtiklágásj gieresvuoda hámijt ja psykalasj varresvuodav. Sån la læhkám mijá siegen dalloj gå lij ållu ájnnasamos.
Midjij Nordlándan ja Trøndelágan la agev læhkám sierraláhkáj mávsulasj vuojnnet man lahka Gånågis Harald lij rijkaoassáj. Sån la nuorttaguovloj ulmutjijt, luondov, kultuvrav ja máhtov guddnedam. Dat la mihásvuodav ja tjanástagáv buktám.
Ietjas moadda manoj ja æjvvalimij baktu la sån vuosedam juohkkahasj la árvulasj. Gånågisá guovtes libá Bådådjon manádam moaddi, duola degu ávvodáhpádusán jagen 2016, ja jagen 2024 gå kultuvrraoajvvestádav rabájma. Biehtsemánon dán jage oassálastij dáhpádussaj Stuorstrávven (Saltstraumen). Gånågis Harald sjattaj nælját vuona monárkka guhti ietjas monográmmav oattjoj gånågisgærggáj.
Gånågis Harald la moatten aktijvuodan dættodam man ájnas roalla Trøndelágan la Vuona histåvrån. Sån la oassálasstám Stiklestada dáhpádusájn ja duhátjahkeávvudallamijn Levangerin jagen 2011.
Gånågis Harald lij rabásmielak ja lij ietjas ájge gånågis. Dákkir iehpesihkaris ájgen, gå luohtádus la ájnnasabbo gå gudik goassak, de nagáj gånågis álmmugav tjoahkkit. Sån bisodij ietjas árvojt. Sån lij jállo ja jiermmá. Sån lij álmmuga gånågis.
Na gijtto de.
Ráfe lehkus Gånågis Haralda mujto badjel.
